Este é o segundo ano que se leva a cabo a iniciativa 12 comercios, 12 sensibilidades. Con ela, traballamos na visibilidade de entidades solidarias ao tempo que impulsamos o fluxo de persoas entre pequenos establecementos composteláns do comercio local. O programa conta coa colaboración da Concellaría de Dereitos e Servizos Sociais, Promoción Económica e Xuventude.

O Refuxio de Bando é unha organización sen ánimo de lucro que se encarga de recoller, acoller e protexer a animais perdidos ou abandonados. Deste xeito, a súa labor complétase coa busca de novos fogares para os animais e co fomento dunha tenencia responsable. As instalacións atópanse na parroquia compostelá homónima.

Pola súa banda, Maravalla é unha tenda de beleza, cosmética natural e coidado persoal situada na Zona Vella de Santiago, na Rúa das Orfas.

Durante todo o mes de setembro, as persoas interesadas en participar poden achegarse ata Maravalla, na Rúa das Orfas nº 24, e axudar aos animáis do Refuxio de distintas maneiras:

• Na recollida de alimentos para os animais.
• Coa vosa doazón económica no peto solidario.
• Mercando unha das láminas solidarias de As Paxaras.
• Participando no sorteo mensual ao comprar no comercio local.